Málráðið gjørt samstarvsavtalu við Fróðskaparsetrið um skrivstovuhald

Fríggjadagin 29. august 2025 var ein lítil samkoma í J.C. Svabosgøtu 7, tí Málráðið nú hevur gjørt eina formliga samstarvsavtalu við Fróðskaparsetur Føroya um at húsast á hesi adressu.

Samstarvsavtalan er eitt skipað samstarv millum Málstovuna á Málráðnum og Fróðskaparsetrið um skrivstovuhald og ávísar fyrisitingarligar og starvsligar tænastur. Játtanin til Málráðið verður liggjandi hjá Almanna- og mentamálaráðnum, men ræðisrætturin til játtanina verður fluttur frá aðalstjóranum til rektaran á Setrinum. Tað merkir, at fakligir spurningar liggja hjá Málráðnum, sum framhaldandi verður ein sjálvstøðugur stovnur, men at fyrisitingarlig og starvslig viðurskifti verða avgreidd í samráð við Setrið. Tað verður framhaldandi starvsnevndin í Málráðnum, sum eitt nú setir og loysir fólk úr starvi á Málstovuni. 

Nýggja samstarvsavtalan ber í sær, at Málráðið og Málstovan betur kunnu hugsavna seg um tað, sum er endamálið við lógini um málráð, t.e. at røkja, menna og verja føroyska málið og føroyska teknmálið. Eirikur í Jákupsstovu, landsstýrismaður, er fegin um, at hølisavbjóðingin hjá Málráðnum nú er loyst og væntar, at Málráðið og Málstovan fara at fáa munandi betri arbeiðsumstøður.

Partarnir, ið hava undirskrivað samstarvsavtaluna, eru umframt Málráðið og Fróðskaparsetrið, Almanna- og mentamálaráðið og Barna- og útbúgvingarmálaráðið, sum varða av ávikavist Málráðnum og Fróðskaparsetrinum.

Beinir Bergsson, nýtilnevndur formaður, sigur seg hava góðar vónir um, at samstarvsavtalan fer at lætta um gerandisdagin á Málstovuni, og hann gleðir seg til at fara til verka við málráðsarbeiðinum.

Málráðið hevur higartil hildið til í Reins húsi, Handan Á 5, men Setrið hevur sjálvt tørv á at brúka Reins hús og hevur bjóðað Málráðnum at húsast í øðrum hølum, har alt virksemið hjá Málráðnum kann rúmast.

Í Málráðnum, sum telur ellivu limir, eru:

Beinir Bergsson, formaður, MA í týskum máli og bókmentum, BA í ritlist, rithøvundur og týðari,
eftir tilmæli frá Javnstøðunevndini.

Lena Reinert, næstforkvinna, BA í føroyskum, vísindaligt hjálparfólk á Føroyamálsdeildini, eftir tilmæli frá Staðarnavnanevndini.

Niels Jákup Thomsen, stjóri á Bókamiðsøluni, fyrrv. lærari og stjóri á Bókadeild Føroya Lærarafelags, valdur av landsstýrismanninum.

Iben Nyholm Debess, MA í málvísindum, ph.d.-vísindastarvsfólk og samskipari á Máltøknideplinum, vald av landsstýrismanninum.

Hjalmar P. Petersen, dr.phil., professari í málvísindum, eftir tilmæli frá Fróðskaparsetri Føroya.

Sigmund Jógvansson, MA í føroyskum, lærari, eftir tilmæli frá Felagnum Føroyamál.

Sonja Winthereig, MA í føroyskum, hjánám í russiskum, námsætlanarstarvsfólk á Námi, eftir tilmæli frá Námi.

Edny Poulsen, sernámsfrøðiligur ráðgevi í teknmáli (tekn til talu), teknmálstulkur, eftir tilmæli frá Deyvafelagnum og HOYR.

Sanna A. Dahl, MA í bókmentavísindum, BA í íslendskum, hjánám í føroyskum, ritstjóri, eftir tilmæli frá Navnanevndini.

Bergur Rasmussen, lærari, rithøvundur og týðari, eftir tilmæli frá Rithøvundafelag Føroya.

Solby A. Christiansdóttir, BA í føroyskum, journalistur, eftir tilmæli frá Mentanargrunni Landsins. 

Málráðið hevur nýliga skipað seg við starvsnevnd, har forfólk og næstforfólk altíð hava sæti. Hesi eru í starvsnevndini: Beinir Bergsson, formaður, Lena Reinert, næstforkvinna, Hjalmar P. Petersen, Sonja Winthereig og Sigmund Jógvansson.

Mynd: Eirikur í Jákupsstovu, landsstýrismaður í almanna- og mentamálum, Beinir Bergsson, formaður í Málráðnum, Bergur Djurhuus Hansen, dekanur og Djóni Nolsøe Joensen, landsstyrismaður í barna- og útbúgvingarmálum.