Skjøtul settur á bygging av vardum íbúðum í Klaksvík og í Runavík

Í góðveðrinum í dag loysti Annika Olsen fyrstu fløgini fyri íbúðum í Klaksvík og í Runavík til fólk við menningartarni. Á heysti í 2015 flyta fyrstu búfólkini ætlandi inn í vardu íbúðirnar.

Dagurin byrjaði við Mylnutún í Klaksvík klokkan 11, tá landsstýriskvinnan eftir stutta røðu loysti fyrsta flagið. Fitt av fólk var komið saman í góðveðrinum í Klaksvík. Borgarstjóri í Klaksvíkar kommunu, Jógvan Skorðheim, fekk síðani orðið, áðrenn leiðin gekk oman til opið hús á kommunuskrivstovuni, har kunnað var um verkætlanina.

Klokkan 13 var Annika Olsen, landsstýriskvinna, omanfyri Rúnarveg og loysti fyrsta flagið fyri byggingina av vardum íbúðum í Runavík. Borgarstjóri í Runavíkar kommunu, Magnus Rasmussen, hevði síðani orðið, áðrenn leiðin gekk oman til alment tiltak í Skúlan við Løkin, har arkitektur greiddi frá verkætlanini.

Samlaða kostnaðarætlanin fyri hvørja verkætlan sær er 16,5 mió. krónur, og pláss verður fyri 10-16 búfólkum í hvørjum. Eftir ætlan skal arbeiðið verða liðugt á heysti næsta ár.